政壇：長毛請幹事唔使示威遊行
成立以來一直走在示威遊行最前線嘅社民連最近要招兵，由於佢哋基本上由籌辦活動到後期支援，都係全民皆兵一手包辦，社民連最近就揼主席「長毛」梁國雄嘅心口，要求首次真金白銀聘請全職會務幹事，據聞該名新員工更有免死金牌，即係唔使參加示威遊行。
長毛被黨友揼心口，要聘請一個全職會務幹事。（資料圖片）
社民連喺官方網頁刊登招聘全職會務幹事嘅特別消息，月薪介乎一萬元至一萬二千元，規定每周工作四十小時，超時工作以假期補償。至於入職要求係中學畢業，工作範圍包括財政出納及記錄、文書處理及資源管理、活動籌備、對外通訊及對內聯繫等，截止申請職位日期為本月二十四日。
其實加入得社民連參政或做職員，理論上都認同議會內外抗爭路線，而且會務同示威行動有時難以清楚劃線，該名會務幹事係咪可以「錫身」唔使參與示威遊行，真係要拭目以待！
