政壇：張德熙自爆係夜鬼
金銀業貿易場理事長張德熙自爆係夜鬼一名，每日都要凌晨四點先上床，但上午已起身，每日都瞓得四、五粒鐘又要起身返工，雖然係咁，佢都話夠精神。
張德熙身兼多職，又要睇實金市，幾乎每日都要凌晨四點鐘先瞓覺。
張德熙今年已六十一歲，年紀唔細，照計應該早睡早起喎，佢笑笑口話，做咗金業多年，由於國際金市係廿四小時運作，所以佢早就習慣咗好夜先瞓，希望睇實金價走勢。深夜睇市時，佢除咗睇住金市，仲會刨四、五份報紙，兼睇埋電視報最新嘅國際金融訊息，間中亦會約吓朋友聯誼，所以凌晨時分，佢嘅生活好充實！
一向鍾意講笑吹水嘅張德熙仲話，夜晚兩點都會WhatsApp畀貿易場嘅同事，叫佢哋預備第二日嘅工作。除咗金銀業貿易場嘅職務外，佢仲有近二十個職位，包括張氏金業董事總經理，幾間公司嘅主席。
