鬍鬚曾一知半解 龜兔賽引喻失義

曾俊華喺佢個網誌發表偉論，用「龜兔賽跑」做比喻，佢話本港嘅收入同開支，就好似烏龜同白兔咁，過往白兔雖然一直沉睡，但一旦發力起跑，不論烏龜領先幾多，白兔都會超越。即係話，開支飆升遲早超過收入增長，導致「結構性財赤」喎。其實講嚟講去，咪又係想為自己嗰份「沒有最廢，只有更廢」嘅財政預算案「平反」咯，真係講嘅唔厭，聽嘅都厭喇。

最好笑嘅係，財爺一方面講到好似世界末日咁，另一方面又自打嘴巴，話本地生產總值及收入都有上升空間，政府亦唔一定要閂水喉，仍會繼續推出利民政策喎。正一神又係佢，鬼又係佢，精神分裂！

鬍鬚曾亂噏當秘笈，一味為自己開脫，直頭係侮辱《伊索寓言》呢本經典喇。計太一叮話齋，其實「龜兔賽跑」寓言最啱嘅比喻，唔係乜嘢開支同收入，而係一直被喻為「雙城記」嘅香港同新加坡。係人都知，以前香港係亞洲四小龍之首，新加坡拍馬都追唔上，但家陣風水輪流轉，新加坡呢隻「烏龜」唔止後來居上，仲遙遙領先添。

最諷刺嘅係，鬍鬚曾仲無厘頭咁讚新加坡「成功突破人力及土地資源局限，推動經濟高速增長，值得香港人學習」。問題係，香港愈來愈沉淪，經濟發展停滯不前，鬍鬚曾身為港府高官，負責掌管財政，香港搞到咁嘅地步，樣樣不如人，唔通佢無責任嘅咩？

係人都知，香港窮得只剩下錢，截至今年一月，財政儲備已突破八千億元大關。面對民生維艱，財爺竟然仲要「減甜」，要「審慎理財」，「量入為出」，簡直就係現代版「何不食肉糜」。講真，市民唔係反對政府慳住使，亦唔係要香港學澳門咁年年派錢，而係不滿鬍鬚曾守住巨額財政儲備仲大嗌狼來了，用「結構性財赤」嚟呃神騙鬼。

大家一定記得港督麥理浩時代，庫房年年掹掹緊，實力同家陣相差十萬八千里，但當年政府一樣大力推動房屋、教育、醫療等社會改革，為香港經濟發展奠下基石。可見政府只要應使則使，還富於民，照樣可以刺激經濟，創造繁榮。咁顯淺嘅道理，你知我知，居然只有財爺一個唔知。講到縮頭烏龜咯喎，邊個似啲，大家心照喇，叮！