城中鏡：汪圓圓佗馬B 奶奶有獎
「玩具大王」蔡志明嘅仔蔡加讚舊年十一月同汪圓圓結婚，早前佢哋宣布有喜懷馬B，尋日蔡加讚媽咪蔡李惠莉現身慈善活動，對即將榮升「嫲嫲」，蔡太表現開心，問到幫BB改名未？蔡太話：「依家未定，仲有好多時間諗。」咁想圓圓繼續生多幾個？蔡太話：「應該唔只一個。」佢話圓圓依家喺食方面好正常，只係都有嘔吐現象，而因為佢哋嘅新居裝修中，所以依家都一齊住。至於BB打算喺香港抑或喺外地出世？蔡太話最好留喺香港，但一切仲未決定，會聽多啲人嘅意見。
蔡加讚同汪圓圓都好鍾意小朋友。（資料圖片）
蔡李惠莉計劃喺屋企興建一個兒童樂園，畀孫仔孫女玩。
講到會唔會獎勵新抱？蔡太坦言：「我成個乖仔獎咗畀佢啦。」再追問係咪比預期快咗抱孫？蔡太話：「都唔係嘅，佢哋想順其自然，不過，佢兩個都好鍾意小朋友，見家姐個BB咁得意都想有，所以佢哋都好開心。」佢又話生男生女都冇所謂，而老公蔡志明都好開心，因將來屋企一定好熱鬧，所以已計劃喺屋企興建一個兒童樂園，畀孫仔孫女玩。
