城中鏡：蔡陳淑儀解讀愛駒「駔驍駿驥」
馬場尋日舉行仁愛堂盃賽，一眾仁愛堂董事局嘅核心成員未開賽前已抵達馬會廂房，仲搞咗個以盛裝舞步同綠色為主題嘅午宴添，而喺玩問答遊戲嘅時候，總理蔡陳淑儀同佢老公蔡志良嘅愛駒名稱「駔驍駿驥」嘅讀音仲考起唔少朋友，引起大家熱烈討論。
蔡陳淑儀（右）同蔡志良打算日後嘅馬名都以「駔驍」做頭。
陳鄭玉而（左一）、副主席史顏景蓮（右一）、仁愛堂總理陳麗珠（右二）同前總理鄭俊基太太（左二）悉心打扮出席盃賽活動。
本身係醫生嘅劉業光較少出席社交場合，尋日罕有同太太現身馬場。
搵教授正音
點解會幫愛駒改個咁嘅名？蔡太話有一排得閒揭字典，無意中就畀佢發現咗「駔驍駿驥」呢四個字，全部都係良駒咁解，所以就幫愛駒改咗呢個名喇，點知好多馬評人都唔知個名點讀，所以佢就同老公一齊搵咗個教授去確認真正讀音，原來駔讀音「莊」，驍讀僥倖個「僥」音。
即將喺月底卸任仁愛堂主席一職嘅陳鄭玉而喺活動上總結過去一年感受，佢話以前做慈善只係識捐錢，做咗主席先感受到自己一手一腳、親力親為去幫人嘅感覺。雖然佢從未試過咁忙，甚至犧牲咗同家人相處嘅時間，之前仲因為抽唔到時間而冇同老公一齊去旅行，好在老公好體諒，嚟緊卸任之後可以補番喇。
同場仲有新界鄉議局主席發叔劉皇發次子劉業光同太太Michelle、跟尹光學唱歌兼致力慈善服務嘅何國材同陳麗珠等總理，聽聞佢哋仲籌備緊新一屆仁愛堂極地之旅，帶領學生游走亞馬遜上游，發掘熱帶雨林一帶近年因發展帶來嘅改變，推動年輕人思考保育問題，培養佢哋對社會嘅責任感。
