政壇：搞搞政：扮建制派曳仔 田少玩出火

全國政協香港委員尋日喺北京舉行分組討論，田少發言時就話自己喺香港唔敢以政協身份發言，尤其係講一啲批評特區政府嘅言論，因為唔知道係唔係得到中央授權。沈沖總結時終於還以顏色，佢話特區政府係中央政府任命，所以政協委員係應該支持特區政府，又話只要政協委員基於支持特區政府依法施政嘅原則，提出有建設性嘅意見，佢個人認為可以理解，但若然有人提出意見時別有用心，並唔係善意幫助推動特區政府依法施政，就難以令人理解同接受。

沈沖無點名話邊位政協委員唔係善意又別有用心，不過都不言而喻啦。今次係田少扮建制派曳仔以來，首次有中聯辦或北京官員對佢當頭棒喝，所以都唔單止係特區政府對佢不滿、全體主要官員都杯葛富貴黨二十周年黨慶咁簡單囉，亦都唔單止係特區政府同田少之間嘅「私人恩怨」囉。

忽然似鵪鶉擺明玩嘢

其實，田少以立法會議員身份對特區政府都已批評得好盡，忽然又話自己唔敢以政協身份發言，不明就裏嘅人仲會以為佢係隻鵪鶉咁唔敢講嘢添，而且佢做咗政協已逾十年，又點會唔知政協應該講乜嘢？所以佢分明係玩嘢。其實不單止特區政府係中央人民政府任命，全國政協亦都係，對於一啲做事方式「難以理解同接受」又不存善意嘅全國政協，下次唔好任命佢咪得囉。