高永文（右）自爆係「人肉廚餘機」，大搞廚餘回收嘅特首夫人唐青儀唔知有無讚佢幫得手呢？
政府大力推動惜食運動，原來一向關心市民健康嘅食物及衞生局局長高永文喺處理廚餘方面一樣「不遺餘力」。事關佢尋日擔任全城有機日主禮嘉賓，演講時突然自爆每晚返到屋企都會化身成「人肉廚餘機」，專食廚餘咁話。
高永文話每日到咗傍晚六、七點左右，就會收到CALL，問佢返唔返屋企食飯，但佢平日工作鬼死咁忙，所以通常唔使屋企等佢開飯。佢每晚十一點收工返到屋企打開雪櫃，都會發現屋企人留低一大堆餸菜，佢就自自然然化身為一部「人肉廚餘機」，將屋企人食剩餸菜通通「消滅」。
講到呢度，佢就開始認叻啦，話自己化身「人肉廚餘機」，其實對同事黃錦星工作範圍作出一定貢獻，減廢方面功不可沒咁話。不過，用「人肉廚餘機」消滅晒啲食物又會引起過重等問題，進入咗自己嘅工作範圍，高永文唔通倒自己米？
第一手消息請下載on.cc東網
