政壇：譚凱邦黐新同盟

近年中港矛盾鬧得熱烘烘，其中新民主同盟嘅立法會議員Gary范國威，就食住呢條水撈選票。我哋聽聞佢哋嘅同路人、環保觸覺總幹事Roy譚凱邦，好快就會黐埋新同盟嘞！

睇番資料，Gary同Roy兩年前，網民發起為時代廣場UA戲院被迫遷「悼念」走埋一齊，之後就住好多本土議題齊齊發聲，當中以半年前喺台灣深綠報章《自由時報》刊登「反赤化」廣告，要求政府取回單程證審批權「源頭減人」畀人鬧爆。

阿Roy之後成立「人口政策關注組」，仲做埋召集人，繼續同Gary走埋一齊，就新移民發起示威，最近嗰次就係上星期五，新同盟成員去港鐵扮沙甸魚抗議旅客過多，當日阿Roy都喺度。

唔知係生路定死路

我哋尋日問過阿Roy，佢承認依家同新同盟「談婚論嫁」，好大機會入黨，又話當今咁多個政黨中，以新同盟最着重本土議題，一直都有合作，要入政黨「非新同盟莫屬」。

老實講，佢喺○八年參與立法會九龍西直選以低票落敗，四年後諗住捲土重來出選新界西，但最終以聲帶勞損，擔心病情惡化為由放棄。今次諗住黐埋新同盟，睇怕想搵靠山出選啫！佢亦承認會考慮參選，但係冇透露詳情。不過，我哋就聽聞，佢諗住明年區議會出選馬灣，之後就再選立法會新西選區。

嘩！由九龍西轉選新界西，睇嚟佢個心都係一路向西喎！之不過，新同盟嘅地區力量集中喺新界東，要幫佢睇怕都鞭長莫及，尤其外界覺得佢哋喺中港矛盾嘅問題上推波助瀾，再係咁落去，隨時係玩火自焚，靠山變咗塌山呀！真係唔知呢條係生路定死路?