強積金千瘡百孔 小修補無濟於事

呢隻穿窿筲箕就係專門劫貧濟富嘅強積金嘞。呢嗱，強制性公積金計劃管理局又出埋啲屎橋，繼續搵打工仔笨。佢哋話正檢討強積金供款上限及下限調整機制，建議供款下限由現時就業收入中位數五成，提高至五成半，話可以應付法定最低工資上調等變動喎；而上限就會維持喺每月就業收入最高九成水平，每次調整只能加五千元，檢討期就會由四年一次縮短為兩年一次。

上睇下睇，左睇右睇，呢啲變動對打工仔嚟講，根本無關痛癢，變唔變都罷喇。之所以變，睇怕都係因為有立法會議員揚言要係議事堂拉布，抗議預算案「減甜」不特止，對全民退保更加隻字不提，當局至係咁意敷衍吓民意啫。

講真，供款下限隨最低工資調整，本來就係應有之義，唔通叫打工仔倒貼供款咩。研究來討論去至做雞碎咁多調整。強積金老問題成堆唔諗計解決，整啲咁細眉細眼嘅小修小補虛應故事，擺明昆打工仔啫，叮！

唔講猶自可，講起把幾火。強積金實施十幾年，畀人鬧足十幾年。官老爺唔大刀闊斧撥亂反正，一味修修補補掩人耳目，一時話「半自由行」，一時話收費封頂，一時話整合帳戶，全部不切實際。回報低、收費高呢啲老問題一直冇解決，打工仔任人魚肉，見財化水，基金經理就佣金袋袋平安，賺到盆滿缽滿。

都係嗰句，小打小閙，根本醫唔到強積金先天不足、後天失調嘅「絕症」，打工仔指望強積金養老簡直係天方夜譚，惟有推行全民退休保障制度，至可以避免打工仔臨老唔過得世。

強積金百孔千瘡，推行全民退保早就成為社會共識，弊在當局好似借咗聾耳陳對耳咁，充耳不聞，淨係話年中會提交研究報告。長者人數佔人口比例愈來愈高，安老問題愈來愈嚴峻，試問政府仲要拖到幾時呀？

問題久拖未決，完全係因為政府既冇承擔，亦冇誠意。家陣強積金由僱主及僱員兩方供款，如果港府再出一份，變成三方供款，就可以將強積金變成全民退保，非不能也，實不為也。

點講都好，推行全民退保先至係安老根本之道，避無可避，遲做不如早做。港府並唔缺資源，但偏要倒行逆施，坐擁巨額盈餘，卻唔肯作出承擔，為打工仔解決後顧之憂，唔係涼薄冷血又係乜，叮！