SUN奇古怪：SUN潮語：【奔三】
潮語「奔三」雖然係近年先喺香港流行，但係呢個詞語已經喺大陸地區流行咗好一段日子。根據「強國維基」百度百科嘅資料，「奔三」原本係一款電腦中央處理器CPU，即係奔騰三Pentium3嘅簡稱。後來大陸網民就用「奔三」嚟形容奔向三十歲嘅意思，甚至大陸有電視劇以「奔三」為名，講一班年輕人追夢嘅故事。
前排網上流傳一段短片，內容係關於香港將於三十三年後毀滅，當然只係一個虛構嘅故事。片中講述有一粒外太空嘅小行星，即將喺三十三年之後撞擊香港，屆時香港將會化為烏有。大商家爭相撤走，中央即刻採取措施，展開新香港區計劃，撤走香港人。甚至有直升機將IFC吊起運走，赤鱲角機場都要搬走。
故事中嘅主角係一位二十幾歲嘅後生仔，佢同部分香港人冇撤走，留低咗喺度，睇吓有無辦法拯救香港。當啲商家同人走晒之後，香港竟然無即刻變成一座死城，啟德機場重開；無晒大財團之後，小商店反而得到生機；無大陸自由行旅客，反而吸引到啲外國遊客。普選用咗三日就完成，片中長毛仲做埋立法會主席。最後，故事主角仲做埋科學家，研究點樣用死光砲將粒隕石擊碎……片長只有七分鐘，睇得出係啲「奔三」嘅後生仔作品。雖然有啲業餘味道，但勝在夠創意，有幾個位真係拍得幾感人。
「奔三」喺大陸嚟講，係充滿理想，滿有鬥志。正所謂三十而立，三十之前係應該天不怕地不怕，不斷艱苦奮鬥，然後到咗三十理應有一番成就。但係喺香港地，因為大財團大地產商長期屈機，政府啲膠官無實質政策幫助「奔三」一族，加上老一輩從來無理解年輕人嘅困境，淨係識得睇低八九十後，除非你老竇係李生，否則喺香港「奔三」真係舉步為艱。
不過凡事無絕對，寧欺白鬚公，莫欺少年窮。唔同時代「奔三」都有唔同嘅困難要面對，學有啲人話齋，最緊要「迎難而上」，有幾個本地「奔三」族，參考人哋嘅手機遊戲，都賺幾億啦。「奔三」嚟講，唔放棄，始終會創一番新天地……如果好彩嘅話。
