政壇：搞搞政：新民黨公記有拗撬 葉劉頭痕
牽手唔容易，新民黨同公民力量（公記）結盟將近一個月，開始傳出唔少磨合問題，主要原因係新民黨行中產路線，公記就主打基層牌，雙方喺政策同民生事務方面都會有啲分歧，公記中人就話，佢哋拉隊請願，都會專登諗定口號，以免支持者誤以為佢哋咁忘本，同新民黨結婚就淨係關顧中產權益，忘記基層喎。兩個組織有拗撬，最頭痕嘅一定係葉劉淑儀，佢係新民黨主席，又做咗公記嘅會長，如果唔可以平衡，就難免順得哥情失嫂意。
設計圖片及對白
講番上月底財政司司長曾俊華（鬍鬚曾）公布預算案，當日發生咗段小插曲，據聞公記當日去政府總部外請願，葉太就拍心口話會盡量安排佢哋親手向鬍鬚曾遞交請願信兼合照，據講，當日葉太的確有兌現承諾，請到鬍鬚曾出去接公記成員嘅請願信，可惜公記請願嘅位置冇傳媒，其他政黨同記者都集中去晒政府總部嘅另一邊示威，所以公記請願完全冇機會見報，極其量只係有幅相放落區議員工作報告宣傳吓啫，認真爆！
有公記成員就話，唔明白葉太嘅諗法，唔知佢係咪因為孭住行政會議成員個身份，所以先安排佢哋去啲記者見唔到嘅位置做吓樣，影張相，求其交吓功課，安撫吓佢哋咁話。
