政壇：周沁拉隊撒哈拉紮營
香港青年聯會賢慧社召集人周沁同青聯會董陳穎妮、菁英會會員林玥彤及好友Jenny四位靚女，農曆新年期間結伴往北非摩洛哥旅行，除咗暢遊馬拉喀什一帶遊古城咁簡單，仲深入撒哈拉沙漠添。雖然路程遙遠又辛苦，但佢哋齊聲話非常值得。
周沁（左二起）、陳穎妮、林玥彤及Jenny（左一）無懼風沙同寒冷，喺撒哈拉沙漠紮營過夜。（受訪者提供）
撒哈拉沙漠一帶早晚溫差好大，佢哋無懼風沙同寒冷，喺沙漠紮營過夜。四位靚女話，佢哋同當地司機導遊打成一片，圍住營火食飯唱歌跳舞，姊妹們在漫天星星下促膝長談，在沙漠上睇日出、騎駱駝嘅經歷真係畢生難忘。不過，佢哋返回古城途中卻遇到大風雪，山路受阻，幸好司機導遊非常專業，當機立斷兜去另一條比原定路線多十小時車程嘅公路，千辛萬苦先至安全返回馬拉喀什。
翌日就係年三十晚，佢哋去咗當地一家好Grand嘅皇家酒店品嘗一餐摩洛哥風味，大家亦享受一個異國嘅團年飯。
