婦女事務委員會尋日喺政府總部舉行三八國際婦女節慶祝酒會,拔萃女書院校長劉靳麗娟以婦委會主席身份上台致詞,原來佢曾經擔心喺周六早上搞酒會會「拍烏蠅」,見到台下咁多婦女出席先鬆一口氣。尋日嘅酒會有個特別人士,劉太嘅丈夫、財經事務及庫務局副局長劉怡翔(James)都有現身,不過兩公婆就似乎有啲避忌,全程甚少交流。

劉靳麗娟(右)與丈夫劉怡翔同場少交流,只係徇眾要求上台影張合照。

劉太尋日以主人家身份滿場飛,同一眾嘉賓打招呼,James就只係企埋一邊同位外籍女士雞啄唔斷,有時獨自攞食物。兩公婆同場冇理由唔影張相,最後James喺徇眾要求下先至企上台同太太影咗一張合照。劉太話工作多,睇怕呢個周末都係陪唔到丈夫喇。James就話,自從佢加入官場後,不時都會喺公開場合見到太太,唔覺得少咗時間見面。

不過,被問到會唔會抽時間慶祝婦女節,James就尷尷尬尬話成日都會同老婆慶祝喎。

第一手消息請下載on.cc東網iPhone/iPad/Android/Windows Phone Apps