政壇：阿Paul 何君堯瞄準中產會
中產係沉默嘅一群，但亦係對社會及政治最有意見嘅人，近年唔少政黨都紛紛打中產牌，但有幾多獲中產人士認受，真係好難講。有個名為「中產會」嘅組織近來動作唔少，原來招攬咗一啲人士加入，好似立法會議員謝偉俊（Paul）、曾經兩度參選立法會嘅律師會前會長何君堯（Junius）等，兩個法律界人士加入，令中產會嘅專業色彩濃咗唔少，據講，呢個會嚟緊有好多部署，絕唔係單純為中產發聲咁簡單。
設計圖片及對白
阿Paul由○八年當選至今一直都係一支公，冇加入任何組織或政黨，最近佢就多咗個身份，就係中產會。原來自施政報告及財政預算案發表後，好多中產人士都怨聲載道，前離島區議員林悅就搵咗唔少中產人士組成中產會，熱心政壇嘅Junius亦同阿Paul成為會友。
唔好以為阿Paul同Junius靠林悅先至認識，其實佢哋除咗係律師行家外，早喺九十年代已經「不打不相識」。如果大家有留意新聞，應該仲記得阿Paul喺九七至九九年間，曾經着泳褲宣傳「法律是與生俱來」，之後香港律師會就此展開紀律聆訊，Junius有份參與其中，最後裁定佢停牌，直到○九年事件先至告一段落，兩個人咁樣唔知叫唔叫「結緣」，但今次齊齊為中產代言，最少瞄準同一目標、眼光一致。
擬提交政改方案
佢哋嘅組織雖然叫中產會，除關注預算案、雙辣招影響外，仲會就政改提交方案，初步希望加入公民提名元素，提名委員會四大界別外新增十八區市民組別，參選人要得到各區支持，或將全數民選區議員加入提委會。連選舉都研究埋，話佢哋唔諗住進軍議會都好難令人相信囉。
