茫茫霧霾罩神州 沉沉烏煙鎖香江

身兼全國人大代表嘅中國工程院院士鍾南山指出，中國霧霾已經遠遠超過聯合國允許嘅最大濃度，咁嘅濃度喺西方連動物測試都未做過。換句話講，霧霾對人體危害有幾大，根本冇人知。《美國科學院院報》嘅研究報告亦發現，由於使用燃煤供暖，中國淮河以北嘅居民預期壽命短咗五點五二年，降塵濃度每立方米增加一百微克，預期壽命短三年，主要因為心血管同呼吸系統疾病。治霾主要嘅辦法就係減排，減少汽車數量，確保車輛達標、油品合格同解決交通擠塞。

話時話，空氣污染已經唔係新聞，今年全國兩會中，霧霾就係最矚目議題之一。國家氣候中心數據顯示，二○一三年以來，北京霧霾嚴重程度前所未有，舊年頭一百日，霧霾天氣佔咗近一半，比常年同期多五倍幾，為近六十年最多。

驅霾迫不及待，治污迫在眉睫，連國家領導人都要向霧霾「宣戰」。習近平提出，空氣質素直接關係到民眾嘅幸福感；李克強就話，治理霧霾「不能等風靠雨」，要主動作為。仲有吖，今年嘅中央政府工作報告更首次將治理「霧霾」列入其中，表明要「出重拳強化污染防治，堅決向污染宣戰」。

可惜吖，說時容易做時難，內地高官最叻就係文過飾非，推卸責任。環保部部長居然話灰霾狀況已經出現「積極變化」，只不過係「老百姓感受不到」咋。簡直九唔搭八！

神州庸官治污無能，港產官僚亦係五十步笑一百步嘅咋。呢，環保署啱啱公布一二年本港五種空氣污染物嘅排放清單，結果令市民大失所望，所有污染物嘅減排進度都同預期減幅差一大橛，其中船舶同路邊廢氣元兇嘅氮氧化物排放量，更比一○年上升百分之六。排放不減反加，咁嘅成績單，叫港人點收貨呢？

正所謂，一榮俱榮，一污俱污，香港同內地只有一河之隔，神州霧霾密布，香港唔可能獨善其身，加上港產官僚渾渾噩噩，對治污束手無策，唔搞到烏煙瘴氣至奇喇。

霧霾南侵，香江遭殃。太一叮要叮醒港產官僚，唔好學前朝曾蔭權爵士做「氣候逃犯」吖，如果唔係，遲早被通緝嘅咋。北京空氣污染爆燈，被列入全球旅遊警告名單，如果香港亦變咗「生人勿近」，你哋就係「千古罪人」喇，叮！