SUN奇古怪：【膠遊】Gaau1 Jau4
潮語「膠遊」就係用嚟形容香港呢種有秩序又文明，口號都唔多句，又沉默兼和理非非嘅遊行。「膠」係指戇居之中帶點笨，以前喺本欄都介紹過，「遊」當然係指遊行，即係來來去去都係由維園行去政府總部，或者再慳水慳力啲由遮打花園過條馬路去門常開，嗰種公益金百萬行式遊行。「膠遊」嘅意思，就係好膠地不求結果但求行吓嘅港式示威活動。
烏克蘭早前發生嘅反政府示威，最後都演變成流血衝突。面對政府軍警武力鎮壓，烏克蘭人民勇武頑抗，一直佔領首都基輔多個政府辦公地點，癱瘓政府運作。最後，烏國人民成功迫使亞努科維奇政府倒台，要着草去俄羅斯，成個國家登時七國咁亂。有啲香港時評將烏克蘭示威借鏡佔中，話如果佔中搞到好似烏克蘭咁，香港就實死得。
WELL…香港係國際知名嘅示威之都就係人都知，每逢星期日無論任何政黨都會搞遊行，由幾丁友至幾十萬人不等，但每次示威遊行活動，除咗有懷疑社團人士收錢參與嗰幾次較激之外，大部分港式示威都係秩序井然，行完畀啲掌聲自己之後就散水，第日準時返工。就算有五十萬人上街，政府最後都係例牌回應幾句，「政」反雙方表現專業。
自2003年香港五十萬人遊行，成功令政府擱置二十三條立法，並間接令董伯伯、葉劉淑儀、梁錦松及楊永強下台之後，經過咗咁多年，呢種「膠遊」愈來愈無力，甚至連遊行口號都愈嗌愈溫和，無火又無力，示威變示弱，愈遊愈膠。「膠遊」完畢後，所謂泛民政客就放題抽水，繼續不思進取扮爭取。再咁落去，去「膠遊」不如真係去「郊遊」好過。
所以，依家嗰啲由網民發起去廣東道嘅「驅蝗」行動，反而仲吸引到當權者注意，政府膠官即刻有反應，表面上強烈譴責，實質上即刻研究對策。雖然未必絕對同意佢哋嘅手法，但作為社會運動，起碼比「膠遊」有效果，係咪？
