除咗將會喺本月底投票嘅南區區議會海怡西補選外，仲有離島區東涌北同東區南豐兩場選舉。隨着兩場補選將近接受提名，據聞人民力量決定唔派人參加東涌北補選，等泛民主派陣營內嘅余俊翔可以一對一對撼離島前委任區議員梁兆棠。咁即係話人力副主席兼立法會議員「慢必」陳志全就唔使喺嗰度進行任何狙擊行動喇！

設計圖片及對白

人力近年經常會派人參加區議會補選，仲打正旗號狙擊白鴿黨，白鴿黨次次輸咗選舉後都例牌指摘人力鎅票，令建制派對手可以漁人得利。

今次東區南豐補選係因為白鴿黨原議員梁淑楨因病而出現嘅議席空缺，本來只係得白鴿黨同建仔對壘，人力內部一早講明唔派人出選，話覺得該區補選冇乜話題性之餘，兩個疑似候選人嘅知名度又幾乎等如零，覺得集中火力做好南區海怡西補選先至算。不過，人力最近又向外放風，話有成員有意參選南豐補選，但始終要開會商量後先有最終決定。

第一手消息請下載on.cc東網iPhone/iPad/Android/Windows Phone Apps