政壇：打造東大嶼都會波波幫政府倒米

委任名單當中，除官方委員外，仲委任咗十九位非官方委員，當中建仔有三人，包括立法會議員陳恒鑌、離島區議員周轉香、黨副主席陳勇，就連白鴿黨立會議員胡志偉都有份。原本建制派佔優實屬正常，但建仔有三人被委任就有問題喇，點解？咪係工聯會極之不滿佢哋冇份加入囉！

據聞有工聯會中人曾質問波波發生咩事，點知波波就好順口咁回應話，建仔始終係政府嘅盟友喎，工聯會中人唔慶就假啦！不過更加侮辱嘅事跟住就發生，話說波波翌日立即向工聯會中人解釋，自稱已同特首商量過，由於委員會名單已公開，所以唔方便再加任何人入去，問工聯會介唔介意做委員會轄下嘅小組委員會成員喎？

話晒工聯會喺新界西有麥美娟同勞工界嘅鄧家彪兩個雙料議員，鄧家彪更係東涌逸東邨北區議員，淨係做小組委員會成員，你估施捨咩？所以聽聞工聯會最後決定唔會加入，仲聲言同波波冇偈傾。連一直撐政府嘅工聯會都同波波掰晒面，真係唔知點收科？