政壇：程守宗去白宮推銷黑莓

加拿大智能手機品牌黑莓（BlackBerry）嘅市場佔有率，舊年年底跌到得番百分之六，但星級用家並唔少，除咗大家熟悉嘅美國總統奧巴馬，仲有美國國防部同埋白宮，據講白宮官員每人都獲政府派一部黑莓。黑莓「港產」行政總裁程守宗正全力救亡，自然要mark實奧巴馬為首嘅一班貴客，所以早前親自去咗白宮拜訪。

程守宗

程守宗出過乜嘢招數游說白宮繼續捧場？佢唔肯露口風，淨係話聽吓各位大人鍾意啲乜同應該改進嘅地方，會面純粹係普通聽吓意見喎。佢維繫客戶關係確實不遺餘力，接掌帥印短短三個幾月，已親自同超過一百位客戶傾偈。

其實佢一上場，就全速將黑莓嘅市場轉移至每日要收發大量電郵嘅政府同商業機構。因此，上個禮拜喺西班牙巴塞隆拿首次亮相、可能會喺九至十月發售嘅新手機「Q20」，就裝番咗消失咗一段時間嘅鍵盤。