政壇：「熨斗大王」唔想做一哥
面對內地營商環境愈來愈艱難，東保集團主席Charles陳鑑光早前自爆話「熨斗大王」名號分分鐘保唔住。事關大陸行家一味鬥平，對產品質素要求唔高，把關不嚴，求其有得散貨就算。但係佢對產品嘅要求高，低檔次產品根本就過唔到佢嗰關，所以唯一求存之道係堅持走中高檔路線，寧願製造高增值產品，亦唔想一味同人哋鬥做一哥。
陳鑑光夫婦對產品嘅質素要求高。（資料圖片）
Charles又慨嘆，以前廠家做生意成功與否，係以員工數量多少論英雄，但隨着內地人工支出愈來愈高，廠商被迫削減人手降低成本。唔止做廠係咁，做零售業亦唔好過，佢有位朋友喺內地開連鎖店，有日其中一間分店店長朝早突然話唔返工，結果成間舖頭焗住關門大吉一日，損失慘重。佢感慨話內地八十、九十後年輕人冇乜責任心，僱主想搵一位肯做又能做嘅員工真係好難。
