香港青年工商界早前舉行新春聯歡晚宴，好多企業二代同政商界名人出席，而唔少人已計劃復活節外遊嘞！好似中華總商會會董張俊勇打算同太太及兩個囡囡去新加坡玩，仲會去全亞洲首個樂高主題樂園馬來西亞Legoland玩，事關佢兩個囡囡好鍾意砌Lego 。

許華傑（中）現身同年輕人打成一片。

廠商會青委前主席顏明潤話，放假想陪兩個化骨龍去郊外野餐，因為佢哋好鍾意大自然同動物，成日扭計要買動物光碟返屋企睇，佢哋連魔鬼魚種類都識分辨，真係唔可以睇小。佢又話兩個囝囝成日拎張餐巾鋪係屋企地下，食生果扮野餐，所以若有時間真係要同佢哋一齊去郊外，呼吸吓新鮮空氣。

康泰旅行社董事總經理黃進達就話受到近日韓劇風潮影響，加上有櫻花，令韓國成為港人復活節外遊首選地方，內地短線團亦受歡迎，雖然昆明發生恐怖襲擊事件，但相信影響唔係太大。

轉頭又見到香港工業總會青年委員會主席馮陳嘉賢、香港中華出入口商會副會長許華傑、商務及經濟發展局副局長梁敬國。梁敬國話上任四個幾月都幾適應，冇乜壓力，仲覺得好開心添！不過，佢十一歲嘅囡囡就唔係咁開心喇，經常投訴見唔到爸爸。雖然係咁，但囡囡就好細心提醒佢應酬唔好飲咁多酒，佢直言覺得好窩心喎！

第一手消息請下載on.cc東網iPhone/iPad/Android/Windows Phone Apps