唔經唔覺,政改諮詢已進行超過三個月,「政改三人組」頻頻落區出席論壇,其中之一嘅政制及內地事務局局長譚志源尋日就聯同署理商務及經濟發展局局長梁敬國「行孖咇」,出席中小企政改論壇。唔講唔知,原來三人組已見過大大小小成九十個團體,真係乜嘢法寶都出齊晒,譚志源除老調重彈外,仲引用愈來愈多比喻,等大家冇咁悶,尋日仲自稱係泛民主派人士添!

設計圖片及對白

潛台詞唔想糾纏

譚志源重申大家都支持普選依從《基本法》同埋全國人大常委會決定外,話說有人問佢乜嘢係篩選,佢話篩選係個弔詭議題,跟住就一步步推論。佢首先講一課社會學ABC,話全世界選舉都係一大班人搵個人做代表,否則由全體市民嚟做決定就好難管治。跟住佢估計全港有二百四十萬人合資格參選特首,但最終都係得一個人做到,咁泛民主派話要冇篩選,原則上嚟講就係違反喇。

咁如果唔係原則上反對,而係效果上各個唔同政見人士都可以參選呢?佢就話一個政黨內部都可以有唔同意見,點樣去定義呢?佢又話如果係要泛民、建制同獨立等黨派都可參選,咁咩係泛民?「我哋官員推動政改,都係民主派喎!」嘩!真係乜都畀佢講晒喎。其實,佢嘅潛台詞都係想話「篩選」係偽命題,無謂喺度糾纏咁耐啫!

佢又話五月完成諮詢後,估計要到七月底先至提交到報告畀特首,之後八至十月由全國人大常委會開會拍板,再由政府就具體方案諮詢,相信要年底至明年初先表決,「有人形容係決戰時刻,我哋拉票,對方就拉布」,到時包括佢在內等官員真係要醒醒定定嘞。

第一手消息請下載on.cc東網iPhone/iPad/Android/Windows Phone Apps