港大排名插水 香港優勢倒退
丟架，認真丟架！近年香港同新加坡比較，幾乎逢比必輸，而且差距愈拉愈遠，連港人引以為傲嘅香港大學，名氣都落後新加坡學府成條街，慘不忍睹。
英國《泰晤士高等教育》公布最新全球大學名氣榜，一如所料，三甲由美國院校包辦，最令人跌眼鏡嘅係，本港排名最高嘅香港大學，只能夠居於第四十三位，比舊年大跌七位。雖然香港仲有科大及中大兩間大學上榜，其中科大排名仲大升十級到五十一至六十位添，可惜始終補唔番港大排名急跌嘅遺憾。反觀新加坡國立大學就氣勢如虹，升到第二十一，唔止遠遠拋離港大，更加同日本嘅東京大學及京都大學一齊，成為亞洲區三強。
《泰晤士高等教育》編輯指出，名氣榜二○一一年首次發布時，港大排名四十二，之後兩年都升，今年居然跌至歷來低位，已經響起警號，如果本港再唔提高競爭力，國際教育樞紐及中西方橋樑嘅地位勢將不保。
其實，警號早已經響咗喇。國際機構舊年九月公布全球大學排名榜，港大「亞洲第一高等學府」嘅龍頭地位，已經畀新加坡國立大學取而代之。上月底有調查機構公布全球大學三十個學科嘅排名，本港大學舊年有三個學科打入全球十大，今年只剩番一個咋。呢次名氣榜再敗一役，香港真係輸到貼地咯。
無可奈何花落去，香港畀新加坡愈拋愈遠，已經不可逆轉，想追番談何容易。本港高等教育一向口碑唔錯，大學排名亦唔低，搞到今日咁，前朝貪曾政府難辭其咎。當局將教育當成產業，一味向錢看，無論對大學資源嘅投放，定係對科技嘅支持力度，都遠遠比唔上新加坡，卒之咪搞到教育質素不進反退，競爭力每況愈下囉！
當然喇，本港學府國際排名急跌，除咗因為競爭力不濟之外，政治因素亦係主要原因。香港回歸以來愈來愈政治化，校園亦不能幸免，淪為政治鬥爭嘅舞台，鬧劇醜劇接連上演。
就以港大嚟講吖，年前因為邀請國家領導人主持百周年慶典而搞到滿城風雨，校長徐立之慘遭「批鬥」，意興闌珊。繼任人候選名單中一位著名美籍華裔學者，亦因為怕咗香港政治環境而主動退出。唔嚟香港，唔知文革還在搞，係人都怕怕喇。
大學校園本來係白色象牙塔，春風化雨，寧靜和諧，教師授道解惑，學生明德格物，可惜今時唔同往日，大學校園變咗文革批鬥場，白色象牙塔變咗政治鬥獸場，連大學學生報都鼓吹「港獨」，連大學民調都被指淪為政治工具。你話嘞，大學校園烏煙瘴氣，人人熱衷於搞政治，而唔係搞教育，名聲點會好吖？排名點會高吖？
港大排名連響警號，其實亦為香港敲響警鐘。泛政治化禍害無窮，再咁落去，香港遲早自己玩死自己嘅咋，叮！
