SUN搞作：網絡小說：網絡戰爭
黑人總統早前曾委派國防部長研製大殺傷力武器，以備終極一戰之用，可惜成品「機械戰士」百毒不侵嘅性能太接近強國人體質，總統先生為免招來剽竊指摘，決定否決投產，仲插咗國防部長一餐。好一個國防部長，唔使幾耐又有新搞作，立刻向黑人總統匯報。
「總統先生，槍林彈雨式嘅戰爭唔再係主流，只有網絡戰爭先可以制霸全球！」國防部長意氣風發，總統先生亦對計劃大感興趣，精神為之一振。「國防部最新研發嘅超級電腦，可以輕易入侵別國國防系統，唔理佢有核武定化武，只要畀我哋入侵咗，操控佢哋自己炸自己都得，到時真係不戰而勝！」黑人總統愈聽愈興奮，即時下達命令：「有咁犀利嘅發明，仲唔即刻投產？今次你為國家立咗大功，果然係不可多得嘅人才！」國防部長得總統嘉許，即時敬禮回話：「請准許本人出訪強國！」總統先生一臉狐疑，「所為何事？」國防部長細道原由：「超級電腦零件全部係強國製，所以要去大規模採購！」
