城中鏡：蜘蛛女讀碩士棄搶包山
長洲太平清醮將喺五月六日舉行，重頭戲之一嘅搶包山比賽尋日截止報名，康文署接獲逾一百五十份申請表，分別有約一百二十男同三十女報名，但仲未計算尋日郵遞報名嘅人數，相信將有一番激戰。
「蜘蛛女」鄭麗莎因兼顧學業同生意，決定放棄參加今年嘅搶包山比賽。（資料圖片）
包山王 郭嘉明、包山后 黃嘉欣
舊年勇奪男女子組冠軍嘅郭嘉明同黃嘉欣話已報名，誓要爭取蟬聯。喺舊年痛失「包山后」寶座、有「蜘蛛女」之稱嘅鄭麗莎，繼三年前因與健美比賽活動撞期未能參賽後，今年又將缺席，佢話：「結咗婚兼顧啲嘢多咗，生意又忙，又要兼顧讀書，報讀咗演藝學院嘅碩士課程，所以無暇再參賽。」
今年係搶包山賽復辦十周年，大會將喺四月十三日舉行安排攀爬包山同防墮安全訓練，完成訓練嘅參加者將喺四月二十日進行選拔賽，賽制以最快時間攀至包山嘅指定高度為優勝，成績最佳嘅九名男選手同三名女選手將可進身搶包山比賽。
另外，長洲郭錦記餅店負責人郭錦全話，預計其餅店喺太平清醮期間可供應七萬、八萬個平安包，今年平安包將唔會加價，維持八元一個。
