城中鏡：鬧市驚見村落 盧健英開眼界
港澳台灣同鄉會早前舉行就職典禮暨二十五周年慶祝晚宴，旅居港澳嘅台灣幫傾巢而出，包括台北經濟文化中心處長嚴重光同光華新聞文化中心主任盧健英等人。盧健英上任至今約半年，佢話嚟咗香港之後至知，原來香港唔止有高樓大廈，仲有好似薄扶林咁嘅村落，令佢大開眼界。
盧健英（右）抽空撐場，賴李承美（中）同邱文潛（左）齊上前招呼。
賴明潔（右）同老公譚錡鋒（左）拍拖到場。
何玉美（左）、張炳煌（右）同台灣鄉親歡聚一堂。
盧健英係知名藝術評論家，佢話已經好適應香港生活，未來會繼續加強港台文化交流。當晚到場嘅仲有港澳慈善基金會主席何玉美、亞洲聯合財務董事總經理張炳煌同中華廠商聯合會副會長Jimmy吳永嘉等。Jimmy同台灣有乜嘢淵源？佢形容自己係台灣迷，每年至少去玩三、四次，最鍾意台灣小吃，由火鍋、牛肉麵、到台灣啤酒都啱佢口味。佢特別懷念高雄嘅黑鰭吞拿魚，諗起就流晒口水，下個月復活節假期，會同老婆及朋友再去台灣擦餐勁喎！
「一人當選 全家服務」
講番交接典禮現場，同鄉會會長一職由邱文潛接任，邱文潛同太太一齊出動招呼賓客，揚言「一人當選，全家服務」，氹到一眾台灣鄉親好開心。卸任嘅賴李承美當晚亦忙到氹氹轉，為咗搞好個活動，盡心盡力做到最後一刻。佢自言離開唔會惆悵，因為將來仲會繼續為聯繫鄉情盡力咁話。
當晚賴太嘅囡囡Kanina賴明潔同女婿譚錡鋒都去咗趁熱鬧，Kanina話兩年來媽媽一直忙於會務，冇時間去旅行，其後發現媽媽竟然累積咗三十多萬分飛行里數冇用過，所以正打算帶佢一齊去歐洲玩，順便消耗里數積分咁話。
