訪問當日，為突出拍攝效果，攝影師提議將0.036毫米的安全套變成「氣球」，不料陳維德二話不說，隨手拿起一個全新安全套，放到嘴邊吹脹，在場人士目瞪口呆，他卻笑笑口說︰「我唔介意，平時我哋做品質檢測，都會吹脹佢做測試，只不過唔係人手，而係用機器之嘛！」

事實上，他亦曾經為「套」尷尬過，「細個讀書都唔敢主動同同學仔講屋企做咩。」避得一時，避不到一世，「我同太太係中學同學，最初拍拖時，因為擔心會嚇走佢，只係話屋企係賣嘢囉，賣橡膠囉，哈哈！直至拍咗一段日子，先至同佢講係做安全套呢行，跟住亦有同外父、外母講，佢哋知道咗亦無咩嘢，係正面嘅事。」

陳維德指父親在他約七、八歲，才跟他交代從事的行業，只是他得悉後沒追問下去，「若果將來自己有小朋友，會早啲同佢講，亦會提早向佢灌輸性教育，始終我哋家族係做呢行，希望佢唔會好似我細個咁怕醜。」

第一手消息請下載on.cc東網iPhone/iPad/Android/Windows Phone Apps