政壇：搞搞政：陳家強高永文 交唔足「功課」

其實，財經局仲有一條《保險公司（修訂）條例草案》喺上半年走咗數，而佢哋原定下半年提交嘅《結算及交易系統（修訂）條例草案》亦都無喇喇剔出咗下半年嘅議程，可以話係走數之王，局長陳家強點搞o架？

財經局就表示，有關保險業同交易結算嘅條例草案預計會喺今年第二季同下個立法年度提交立會，至於被隱形嗰條就要再深入研究吓先喎。

欠交功課嚴重程度僅次於財經局嘅食物及衞生局都有兩條條例草案喺上半年度未能提交。當局就話，上半年未能提交嘅分別係《電子健康記錄互通系統草案》同《藥劑業及毒藥（修訂）條例草案》，前者係因涉及醫療、資訊科技、私隱等問題，所以要諮詢公眾、政府各部門同唔同持份者，所需時間比預期耐咗。

佢哋預計呢兩條條例草案，局長高永文會喺今個立法年度內提交立會。

立法會內務委員會副主席湯家驊就批評政府次次都遲交功課，但今年就最嚴重，仲揶揄係咪公務員工時太短做唔切咁話。