政壇：內地新女富豪低調至上

《福布斯》全球億萬富豪榜早幾日出爐，個個留意邊啲富豪係十大，原來個榜有個亮點，中國出咗個史上最年輕嘅富豪，佢就係二十四歲嘅紀凱婷。

紀凱婷呢個名喺財經界好陌生，原來佢係舊年年底至喺香港上市嘅龍光地產主席紀海鵬個女，紀凱婷依家亦係龍光嘅非執董。

紀小姐係通過唔同公司同家族信託持有龍光地產百分之八十五，《福布斯》話佢嘅身家總共有成十三億美元！

年紀輕輕就已經成為榜上最年輕富豪，仲取代埋Facebook聯合創辦人莫斯科維茨（Dustin Moskovitz）。咁巴閉，多得老竇唔少喇！

不過，紀小姐就好低調，想搵番張佢嘅相都難過登天！皆因公司只係上市咗幾個月，佢又好少出席公開場合，如果唔係公司上咗市，真係冇乜人知佢咁巴閉。

同佢一樣，年紀輕輕就做富豪嘅，仲有○七年上市嘅碧桂園太子女楊惠妍，佢又係超級低調，如果唔係結婚，真係冇辦法睇到佢嘅廬山真面目。