高盛同世界銀行罕有聯手，推出新基金，唔係投資科網或金融，係想幫一班發展中國家女創業家，等佢哋有錢發揮所長，進而推動發展中國家經濟發展。目標唔算誇張，只係籌六億美元，對象係十萬名女創業家。高盛將注三千二百萬美元種子基金，並提供一千八百萬美元為當地女性銀行家同商家提供培訓。

呢個構思來自高盛，佢哋本身有個名為「10,000女性」嘅計劃，過去六年為一眾女創業家提供培訓。

高盛喺做善事方面都算唔話得，前年就捐出二億四千一百萬美元，係美國第四大慈善企業，頭三位係富國銀行、沃爾瑪同雪佛龍，再前一年更加係排名第二。不過，高盛咁做都唔係無私心，皆因華爾街大行喺金融海嘯後臭名遠播，頻頻做善事部分原因係想幫公司嘅貪婪形象洗底。

第一手消息請下載on.cc東網iPhone/iPad/Android/Windows Phone Apps