政壇：AV仁衝出香港 紅到美國？
白鴿黨立會議員「鐵頭仁」何俊仁上周趁財爺宣讀財政預算案，喺立法會偷睇亞洲多國佳麗艷照斷正嘅醜聞熱爆，醜事傳千里，仲畀多個海外網站瘋狂轉載，認真羞家。美國《紐約時報》尋日仲刊登呢位「香港之光」嘅訪問添！唔通最近人稱「AV仁」嘅鐵頭仁真係衝出香港，紅到去美國？
何俊仁
哦！原來《紐約時報》只係就香港政改同「佔領中環」行動，同鐵頭仁做咗個訪問，對談內容唔係乜嘢真知灼見，焦點在於為免海外讀者唔知鐵頭仁係邊位，文章特別用其中一段介紹佢嘅來頭，包括立法會議員兼「知名」律師。所謂「知名」原來講緊佢係美國中央情報局前僱員「走佬特工」斯諾登，舊年過境香港嗰陣嘅代表律師，真係唔講都唔記得。
不過，睇怕《紐約時報》唔夠貼近民情喇，要介紹鐵頭仁，最簡單就係重提佢係上星期轟動香港嘅「獵艷」醜聞男主角，相信會有更多唔識佢嘅讀者留意佢。另外，之前白鴿黨紀委會罸佢一萬元捐畀婦團，據聞新婦女協進會唔肯收。
