政壇：蔣麗芸鄭明明孖住行善
今屆卸任全國政協委員嘅立法會議員Ann蔣麗芸，唔使好似以前咁長時間喺北京開會，所以就留港搵節目。早兩日佢現身有份舉辦嘅「長幼共融盆菜宴」，仲特登約埋同樣已卸任政協嘅「美容教主」鄭明明一齊做善事添！
蔣麗芸（中）同鄭明明（右）齊齊留港做善事。（互聯網圖片）
阿Ann話一早已經想喺深水埗搞啲活動，同區內居民歡聚，後來諗到搞盆菜宴，咪試吓搵鄭明明等婦女界友好幫手贊助，結果大家一聽到呢個建議就好爽快應承。當日筵開二百圍，合共有二千幾人參加，場面好熱鬧。睇番阿Ann放上社交網站嘅活動相，見佢抱住一名好得意嘅BB仔，仲笑到見牙唔見眼，確係好開心。
佢又話由於居民反應熱烈，所以希望年年都舉辦一次。佢又自爆所屬嘅政黨稍後會舉行籌款晚會，其中香港婦女聯合協進會主席林貝聿嘉有份買枱支持。
