政壇：金管貿發舵手交棒成謎
新一輪公職換人潮即將上演！○九年上任金融管理局總裁嘅「攞命陳」陳德霖，同埋○七年首次獲委任為貿易發展局主席嘅Jack So蘇澤光，兩人任期同樣喺今年九月屆滿，至今未有明確訊息呢兩個位有乜人事安排或部署，其中要數最撲朔迷離就係攞命陳嘅去向。因為唔似Jack So事先張揚唔再延任，攞命陳就去留嘅問題無明確表態，令呢項任命花落誰家更添神秘。
設計圖片及對白
任期九月屆滿
首個要重新任命嘅公職就係金管局，其中攞命陳任期會於今年九月屆滿，有傳梁營有意力推金融發展局主席Laura史美倫接任，但Laura一直對呢個傳聞三緘其口，殊不知佢尋日喺北京宣布力撐攞命陳繼續連任，形容佢至今工作表現都良好。
究竟Laura呢招係真心實意撐攞命陳，定係以退為進觀察輿論？咁就只有佢本人至知！
至於攞命陳亦一直冇正面回應去留問題，早前只係將個波交畀財爺，話相信對方會作妥善安排，適當時候會公布。值得一提嘅係，攞命陳一旦今年九月後再獲續任，外界將關注年薪會唔會繼續向上調升，因為資料顯示，攞命陳喺一二年總酬金達九百四十一萬元，預料年薪突破一千萬元只係時間嘅問題。
同樣要換人仲有貿發局主席一職，現任主席Jack So喺○七年開始出任呢個職位至今，佢上月中出席春茗活動時事先張揚唔會再延任主席一職，佢打晒開口牌都係想畀政府多啲時間搵接任人。究竟邊個有能之士會跑出？半年後自有分曉。
