全球華人上東網 瀏覽頁次創新高

地不分南北東西，人無分男女老幼，個個爭相瀏覽東網，先至有如此澎湃高潮。即係咁，今年恰逢東方報業集團四十五周年報慶，東網三月一日起全球免費開放《東方日報電子報》一個月，大手筆回饋讀者，獲得全球華人熱烈回響，太一叮不免要再次向各位鞠躬，多謝捧場！

呢嗱，過去七日，東網港澳網版嘅瀏覽頁次突破一億一千萬，「東網港澳」Android版App嘅單日安裝亦創下單日新高，較二月份平均數字多近四成。至於東方電子刊物嘅總瀏覽量同樣驕人，由三月一日至昨日傍晚六時，瀏覽頁次已超過一千七百萬。就以三月二日星期日計，手機版全日瀏覽頁次較對上星期日增加兩倍，三月三日更加較對上星期一急增兩倍半添。如果唔係蘋果產品審批緩慢，iPhone等iOS用戶仍未能下載「東網電子刊物」App，瀏覽量必定更多o架。

東方報業銳意發展新媒體，打造全球最強華人訊息網絡平台，絕對唔係自吹自擂。不妨聽聽全球網民心聲：澳洲新省好市圍市華裔副市長劉娜心話，每天上東網，就可以睇到最廣泛、豐富嘅資訊；美國三藩市東灣屋崙華人僑領陳錫澎話，可以喺網上睇到整份報紙連廣告，海外華人更貼近香港民生動向；連法國前總統薩爾科齊政府嘅亞洲事務專員何福基都讚不絕口，認為東網及《東方日報電子報》造福海外華人。講到呢度，相信廣告客戶應該笑到見牙唔見眼，喺一份報紙登廣告，有全球華人瀏覽，直情係超值喇！

北京開兩會，全球聚焦，港區人大代表及政協委員雲集北京，佢哋又聚焦乜嘢呢？唔使問，梗係上東網喇，正所謂，一機在手，天下我有，秀才不出門，能知天下事。正如全國政協委員林健鋒話齋，自己身處北京開會，每日有大量新聞資訊需要吸收，為求喺短時間內洞悉中、港大小事情，每朝起床梳洗後第一件事就係透過手機內嘅東網瀏覽新聞，「睇東網可以將香港所有事知得一清二楚，東網係very good。」而另一位全國政協委員張華峰就話兩會期間應酬多，自己最鍾意茶餘飯後瀏覽東網，「報道好詳細，唔睇唔得。」

事實證明，東網係全球最強華人資訊網站，既受普通讀者歡迎，亦為成功人士喜愛，絕對唔係冇理由。太一叮在此恭迎諸君，暢談港事國事天下事！