政府建議提高公屋輪候冊入息限額，變相令更多的人合資格申請，市民聽見就唔高興，一於搵運房局局長炳炳理論。

市民：又話三年就上樓，依家仲調高入息額，多咗人分一杯羹，咁即係三年上樓又淪空話啦！

炳炳：點會呢，我哋都好希望大家三年就上樓，調高入息額係為咗幫助更多有需要嘅市民！

市民：我哋呢批輪候咗咁耐嘅人都未有樓，你就放多批人嚟爭，條數點計都唔啱啦！

炳炳：說話又唔係咁講，有競爭先有進步！

市民：進步？你係咪起多啲樓，等我哋有個安樂窩吖！

炳炳：其實我哋用心良苦呀！

市民：狼心狗肺呀？

炳炳：咁多咗人輪候，大家都知道上樓機會渺茫，咁咪會努力工作搵錢，收入多咗，到時都唔符合資格申請，輪候冊人數自然下降啦！仲鼓吹大家改善生活環境！係咪真係感動流涕呢？

市民：＊＆︿＃＠！＃！如此歪理，可怒也！

第一手消息請下載on.cc東網iPhone/iPad/Android/Windows Phone Apps