生日係特別嘅日子，富商鄭躬明太太陳君宜（Qinnie）卻連續兩年生日都遇到小意外，尋日佢約咗朋友喺酒店食法國菜提早慶生，同老公到場時，佢左手戴着護手吊帶，佢解釋早前不慎受傷甩骹：「有日上車時，跣一跣腳，隻手撳住座位，咁就甩骹」，舊年生日佢跌斷腳，今年又遇到呢件事，佢都忍唔住呻句「幾黑仔」！

何倍倩（後左起）、何國鉦和周國豐為陳君宜（前右）提早慶祝生日。前左為陳君宜丈夫鄭躬明。

Qinnie已經喺醫院做咗手術，遲啲仲要再做，喺手臂加螺絲避免日後甩骹。雖然受咗傷，但一眾朋友如名人周國豐、恒生新抱何倍倩和時裝設計師何國鉦等依然同佢聚餐慶祝生日。原本今次手術後，佢有一段時間唔可以做劇烈運動，但佢一早約咗大班朋友去北海道滑雪，為免令友人掃興，佢哋已決定下周如期出發，不過，今次Qinnie只能夠齋睇，唔可以上場。

第一手消息請下載on.cc東網iPhone/iPad/Android/Windows Phone Apps