城中鏡：兒孫陪食雪糕 邱德根暖在心
爺孫三代同樂，溫情暖洋洋！百仁基金成員邱詠麒（Josephine）日前同家人陪爺爺邱德根喺中環ifc逍遙，佢哋先食午飯，之後幫襯雪糕店食甜品，行程中Josephine同細佬邱華瑋（Andrew）對爺爺照料有加，一家人有講有笑。
邱達昌（右）同邱華瑋（左）一人一邊翹住邱德根手臂，並肩而行。
無隔閡
邱德根（左下）、達昌（左上）、華瑋（右下）及詠麒（右上）食雪糕時有講有笑。
夠細心
邱德根（左下）食雪糕唔小心滴污糟件衫，孫仔華瑋（右二）即時上前幫手。
邱德根同兒子邱達昌、孫仔Andrew等當日下午兩點幾鐘，喺中環ifc行商場，邱達昌同Andrew一人一邊翹住邱德根手臂而行。Josephine就去雪糕店搵定位先。
四人歎三杯夠溫馨
邱家一行抵達雪糕店，Josephine就同細佬去買雪糕，最後買咗三杯雪糕，但邱德根可能唔食得太多凍嘢，就同達昌兩父子分甘同味喇。不過，達昌畀爸爸食先，但啲雪糕溶得好快，邱德根食食吓唔小心滴咗一滴落件衫度，Andrew一見到，就即刻好緊張搵紙巾幫爺爺抹番乾淨，仲拎咗一條圍巾幫佢圍住個領口位添，真係孝順又體貼，難怪邱德根都忍唔住笑咗出嚟。
見邱德根食咗兩啖過足口癮後，就將杯雪糕交畀達昌品嘗，四人一邊食一邊傾偈，盡享天倫之樂，過咗一陣就送老人家到樓下坐車離開。依家Josephine同Andrew兩姊弟都係幫緊家族打理地產生意，各有所長，相信邱德根真係飲得杯落喇。
