政壇：何偉權助釋囚搵筍工
唔少僱主近來都話請人難，商界助更生委員會執行主席何偉權（Ken）計劃聯同中華廠商聯合會喺暑期舉行獄中招聘會，助釋囚搵工，預計有超過一百份筍工，部分薪酬高達一萬五千至一萬六千港元。佢稍後仲會考慮構建一個網上搵工平台或搵工諮詢中心，方便僱主同釋囚。
何偉權（左）將聯同商界為在囚人士舉行獄中招聘會，懲教署署長單日堅（右）相當支持。（受訪者提供）
阿Ken早前出席喺赤柱監獄舉行嘅證書頒發典禮，見證逾百位在囚人士順利完成各類學業課程及公開考試，部分人寒窗苦讀幾年，終獲大學學位，場面感人。但釋囚出獄後搵份好工先係最實際，阿Ken早前搵埋商界領袖密斟搞招聘會，商界極需要紮鐵、五金、木工及大廚等人才，若釋囚可接受有關技術訓練，搵工機會大增，懲教署話會因應市場需要，度身訂造訓練課程。阿Ken仲大畀搵工貼士：「最緊要有自信，唔好自卑。」佢話唔少釋囚未能放低曾入獄嘅包袱，見工時頭耷耷，唔敢正視對方，呢個係見工大忌喎！
