政壇：譚志源玩悲觀論推政改
政改諮詢展開以來，政府三人小組先係大講有商有量，近排就好似改口徑咁，一時話對香港普選大計感到悲觀，一時又話擔憂係「鏡中花水中月」，尋日就輪到政制及內地事務局局長譚志源（Raymond）接棒，話對香港最終能夠通過政改方案不表樂觀，希望大家理性討論，毋須咁快「紮馬」、「反枱」，各方都係想和氣生財，未使咁緊張，反正都未有耐「埋牙」，最重要大家有商有量咁話。
Raymond呢排連日落區出席區議會會議，就政改諮詢聽取各區議員意見，唔知佢係咪眼見日日講到口水乾，但諮詢工作都仍然未見有起色，尋日喺屯門區議會會議尾聲，佢又嚟一招吐心事，又嗌大家唔好咁快紮馬、反枱。Raymond落區推銷政改，唔係遇到抗議，就係舌戰地區人士，今次又拋悲觀論調，有人解讀佢都有嚇吓中間派嘅意思，以免政改工作陷入泥沼，香港人齊齊輸。
