政壇：財政研究預警嚇人 林奮強斥拋大石
本港七年後或出現結構性財赤嘅恐嚇引起坊間各種討論，日前長遠財政計劃工作小組發表研究報告，再談財政危機，一向關心財政政策嘅前行政會議成員林奮強亦立即應戰，喺出席電台節目時再度開炮，批評工作小組嘅報告絕唔係佢哋口中嘅「拋磚引玉」，佢話報告所拋嘅磚太大，只會嚇怕人，而唔係刺激社會良性討論。
設計圖片
唔覺財政前景多危機
早在鬍鬚曾放聲要縮減開支時，林奮強已經批評當局嘅守財政策唔健康，尋日佢再引其他國家作為例子，批評報告建議公共開支不得超出本地生產總值百分之二十有問題，事關有啲國家即使喺經濟唔好嗰陣，公共開支都高過由港府所劃定嘅「緊箍咒」。
林奮強又指，工作小組話要「拋磚引玉」，希望吸引更多團體參與研究，但佢好質疑呢塊磚太大，會嚇怕人，或者喺佢眼中份報告係巨石都未定。講嚟講去，林奮強嘅觀點都係並唔覺得香港財政前景有咁多危機。
工作小組成員、羅兵咸永道高級顧問王銳強尋日亦出席咗另一電台節目，王表示開支佔生產總值兩成嘅建議並唔係硬指標，可以隨經濟規模擴大而調整，但要視乎政府收入有否增加，報告預警七年後出現結構性財赤，相關數據已盡量客觀，避免將狀況講得太嚇人。小組另一成員、中文大學經濟學研究教授廖柏偉則表示，即使調高薪俸稅及利得稅稅率一倍，亦只能令結構性財赤出現時間推遲兩、三年，佢哋嘅睇法遠遠冇林奮強咁樂觀，雙方差距仲好大添！
