中港矛盾日益升溫，「蝗蟲」與「狗」相鬥不斷，確實到咗相當嚴峻嘅地步。連內地官方傳媒都承認大量內地客南下消費對香港造成壓力，仲首次提出解決方案添。你話嘞，如果問題唔係到達臨界點，一向報喜不報憂嘅官方喉舌點會咁焦急如焚吖？
《人民日報》海外版發表署名文章，話內地旅客係港人嘅金主，帶旺市道嘅同時亦擾亂港人生活喎，仲話香港開放過度，有必要稍為收窄，不妨借鑑台灣，對內地同胞採取每日配額制。文章警告，如果再唔諗辦法解開呢個結，港人嘅不滿情緒就會喺心中長大，到時每積壓一段日子就會對內地旅客發洩一下，你都咪話唔大劑。
即係咁，凡事有利必有弊，大量旅客湧港消費，除咗帶來滾滾財富，亦帶來諸多難題，例如交通逼爆、扯高物價及文化衝突等等，的確大大擾亂港人嘅正常生活，絕對唔係高官所講「上唔到車咪等下一班囉」咁輕鬆。所以咯喎，呢個中港矛盾炸彈真係需要拆解，而且愈早拆愈好，無謂又搞出「驅蝗」、「拖篋」趕客呢類鬧劇吖嘛。
中港矛盾點拆彈？梗係靠兩地政府合作喇。內地旅客多來自珠三角，粵港政府合作機制正好大派用場，平時官老爺高唱粵港合作都係吹水唔抹嘴，家陣咪有機會幫兩地居民做番件實事囉。可惜嘅係，官媒有官媒提醒，港官有港官瞓覺，商務及經濟發展局局長蘇錦樑話喎，香港唔會干預旅客嘅旅遊活動，現階段都唔會考慮配額制度喎。叮佢個鎯鎯！港產官僚唔通真係喺火星生活嘅？內地旅客持續增加，香港承受力隨時爆煲，當局仲喺度闊佬懶理，唔嗲唔吊，係咪等到香港陸沉先至識驚吖？再講吖，港產官僚渾渾噩噩，唔考慮配額制，你哋個花崗岩腦袋又諗唔諗到更好嘅辦法吖？
其實辦法唔係話冇，只係港府窩囊，有辦法都變咗冇辦法啫。係人都知，現時內地客來港主要唔係觀光，而係購物消費，只要港府喺邊境設立購物城，分流內地客，問題咪迎刃而解囉。嗱，早前有新界鄉紳邀請港府發展中英街商業區，值得諗，可惜港府無動於衷，充耳不聞。
唉，睇嚟港產官僚都係眼蒙耳聾嘅嘞，市民嘅意見唔聽，連內地官媒嘅告誡都當耳邊風。本港激進團體一味驅蝗排外，固然係飲鴆止渴，愚不可及，港府以金主心態對待個人遊政策，漠視為港人帶來嘅難題，同樣不思進取，過猶不及。睇嚟應該實施限制嘅唔止係內地旅客，仲有無能官僚吖，叮！
第一手消息請下載on.cc東網
