城中鏡：陳湛全偕妻 赴歐睇冰上賽馬
荃灣區議會主席陳耀星嘅囝囝、香港馬主協會會長Charles陳湛全早前同太太及一班馬主遠赴瑞士睇冰上賽馬，點知賽事因天氣惡劣而中途腰斬，幸好呢個賽事已有成個世紀咁耐，早已發展到好似大型嘉年華咁，冇咗賽馬，仲有美酒佳餚、現場音樂表演同展覽，唔怕悶親。
瑞士冰上賽馬已有一個世紀歷史。
陳湛全（右）同太太結伴去瑞士睇冰上賽馬。（受訪者提供）
Charles話每年大約二月，當地嘅聖莫里茨湖就會結冰幾個星期，於是趁機喺湖面上舉行賽馬，至今已有近百年歷史。佢話係第一次喺遍地白雪嘅夢幻環境下，觀賞名駒馳騁嘅英姿。
佢又話出賽騎師落馬嘅方式好新穎，喺馬匹衝線一刻，全部騎師一齊飛墮落地。後來佢先知，原來係因為風雪太大，馬蹄啜住雪地，導致騎師跌咗落地啫！由於天氣太惡劣，賽事只進行一場就被迫腰斬，結果幫手睇住啲手袋嘅陳太錯過第一場就冇得睇，惟有明年再嚟過。
