城中鏡：夫唱婦隨習京劇李和聲好氣
上海總會早前一連舉行兩場春茗，先係上海鄉里自家人團聚，跟住係宴請近百名香港中文大學內地生參加《家在香江》春茗聯歡活動。總會永遠名譽會長李和聲、理事長王緒亮同一眾理事都有出席。見李和聲精神爽利、面色紅潤，趁機請教佢嘅養生之道，原來佢好鍾意唱京劇。唱京劇少啲氣都唔得，佢成日唱曲當練氣，唔怪得年屆八十七歲仍然咁精靈。
李和聲（左）同太太尤婉雲唱曲當練氣，難怪咁精神。
高鼎國（右起）、金維明、顧東華同車弘健齊歡聚。
王緒亮（左）同李德麟笑迎新春。
囝囝李德麟各有各唱
李和聲話喺中環擺花街創辦一間票房，方便一班票友得閒去玩。佢同太太尤婉雲都係京劇發燒友，每個星期至少去兩日，兩公婆經常夫唱婦隨。問佢囝囝、金銀業貿易場前理事長李德麟有冇呢個喜好，佢笑稱自己間中都會唱京劇，但就同爸媽各有各唱。
講起《家在香江》計劃，曾出任中大校董多年，並捐建中大和聲書院嘅李和聲話，當年佢有感於內地生隻身在港過年過節好淒涼，所以發起呢個計劃為佢哋送暖，眨吓眼已十四年，期間好多優秀內地生畢業後留港就業，為本港金融同專業界提供好多人才。中大學生事務處處長梁汝照就盛讚內地生讀書好叻，大家去中大圖書館睇吓就知，因為入邊全部係講普通話，仲笑稱唔知本地生都去咗邊。
王緒亮就話今年打算捐助三百萬元支持惜食堂成立廚房，以便為更多有需要人士提供愛心飯盒。當日到場嘅仲有全國政協副主席安子介孻孫安宇昭嘅外父金維明、香港鐘表業總會主席高鼎國、上海總會常務理事顧東華及青年組主任委員車弘健。
