話說港鐵為咗逃避超負荷嘅指控，竟然拆走座位騰出企位，又玩數字遊戲掩飾車廂擠迫度，被揭穿後可謂媽聲四起，但係又吹佢唔脹，主管房屋事務嘅炳炳眼見咁着數，就約咗港鐵高層出嚟傾密偈，希望可以從中偷師，幫港人解決房屋問題。港鐵高層對住虛心求教嘅炳炳，亦都將心得傾囊相授，就係咁，炳炳醞釀再醞釀，發酵再發酵，新房屋政策終於成形：
一、現時公屋輪候策大排長龍，在於供應量不足。只要將現有公屋重新分配，五人家庭住二人單位，六人家庭住三人單位，騰出嚟嘅大單位又劏開幾個細單位，肯肯定可以即時加快上樓。雖然玩港鐵式數字遊戲掩飾擠迫度，係就係無恥啲，但係話晒都叫有車搭有屋住，佢哋吹你唔脹嘅。
二、以拆走座位騰出企位為藍本，建設新型公屋。簡單而言，就係摒棄所有樓層間隔，用盡空間以罐頭沙甸魚方式分配領地，從港鐵經驗所得，雖然用家唔使旨意有位坐，但係話晒都叫有車搭有屋住，佢哋吹你唔脹嘅。
新房屋政策出爐，果然解決咗香港住屋大難題，全城無殼族亦都對炳炳同港鐵嘅貢獻永誌不忘。
第一手消息請下載on.cc東網十方無敵
