政壇：搞搞政：婦團送寫真集狙擊AV仁
財爺鬍鬚曾上周三喺立法會宣讀新一份財政預算案期間，白鴿黨立法會議員「鐵頭仁」何俊仁喺議事廳瀏覽日本女優同多位國內年輕女模特兒嘅性感照片，仲畀多間傳媒影低咗佢嘅「罪證」。鐵頭仁貪嗰一時嘅快活就換嚟一堆手尾，除咗畀網民嘲笑佢為「AV仁」同「何盡淫」之外，仲要面對白鴿黨嘅紀律處分，依家仲有婦女組織聲言要狙擊AV仁，話要送本寫真集畀佢返屋企睇，等佢唔好喺立法會大庭廣眾睇，教壞細路咁話。
「正義聯盟」召集人李偲嫣喺尋日傳媒聚會時就話，佢早排就鐵頭仁開會睇艷照去信畀鐵頭仁同多位立法會議員投訴，仲畀咗七個工作天嘅時間佢哋回覆，不過至今都未有議員覆信，所以依家諗緊下一步行動，例如會送寫真集畀鐵頭仁，而寫真集嘅「主角」應該係亞洲佳麗，事關歐洲佳麗太高頭大馬。
李偲嫣又話擔心鐵頭仁有性沉溺，如果識得佢太太就會介紹佢太太入聯盟嘅婦女組。佢又建議鐵頭仁，如果下屆唔做議員，可以成立「亞洲模特兒中心」，話唔定會有「輝煌事業」喎。
我哋就問過鐵頭仁點解冇覆李偲嫣嘅信，佢就話收唔到封信，亦都唔知李偲嫣送書係乜嘢意思咁話。
