政壇：周松崗袍金增幅勝李小加
早前講過港交所行政總裁李小加舊年份糧「大加」，原來港交所一班非執行董事都唔弱，事關今年又再建議佢哋加人工，其中主席周松崗，袍金會由現時嘅九十萬元，加到一百五十萬元，上升足足高達百分之六十六，「加幅」拍得住李小加舊年度總收入增幅嘅百分之五十五。至於其他非執董，袍金亦由六十萬元加到七十萬元，加幅達到百分之十六點六。
周松崗嘅袍金由現時嘅九十萬元，加到一百五十萬元。（資料圖片）
其實，周松崗舊年份收入已有好大進帳，達一百九十一萬元，較對上年度嘅九十五萬七千元，上升接近一倍。事關佢除咗港交所外，仲係港交所旗下倫敦金屬交易所（LME）非執董，同埋坐鎮LME幾個委員會。若果今年港交所主席加人工，估計佢今年收入坐底都有成二百五十萬元，份糧都幾厚。相信好多人都會羨慕佢，做非執行主席份糧，同打工原來相差唔係好遠！
仲記得港交所班非執行董事喺一二年時至加過人工，舊年「凍薪」一年後，今年又再加過。但觀乎港交所嘅股價，長期停滯不前，唔知港交所啲股東覺得點呢？港交所喺薪酬委員會報告中解釋，加薪建議係考慮咗顧問嘅檢討結果，但LME、LME Clear同場外結算公司嘅非執董薪酬就不變。
今年港交所股東會定於四月十六日舉行，兩名政府委任董事周松崗同范華達任期屆滿，由於佢哋只係做咗兩年，預計獲再度委任。兩名選任董事郭志標同李君豪亦任期到，提名委員會已決定提名兩人參選。因此預計今年AGM應該冇乜火花，好平靜！
