克魯格曼下年暑假轉到紐約市立大學（CUNY），做博士課程經濟系教授。（資料圖片）
○八年諾貝爾經濟學獎得主克魯格曼，宣布將會離開佢做咗十三年嘅普林斯頓大學，下年暑假轉到紐約市立大學（CUNY），做博士課程經濟系教授，同埋喺盧森堡收入研究中心做研究。
克魯格曼話原本打算做多啲公共政策嘅研究，點知撞啱幫手搭路嘅CUNY開個位畀佢，佢又可以順道由新澤西州搬返兒時長大嘅紐約老家。
克魯格曼早幾日喺《紐約時報》嘅專欄度自爆未來去向，話工作上嘅轉變唔會影響到呢個專欄，強調過檔CUNY唔係代表普林斯頓有乜唔好，只係自己想多啲時間搞吓公共政策研究，特別係收入不平等呢個問題，相信世界上冇乜邊個地方比得上盧森堡收入研究中心，可以提供到一流嘅環境去做呢方面研究喎！
CUNY出名盛產諾獎得主，除咗有十二名校友攞過諾貝爾獎，英特爾前行政總裁格羅夫，同埋拍過長壽電視劇《宋飛正傳》嘅著名諧星謝利辛洛菲，都係呢度嘅校友。
第一手消息請下載on.cc東網
