政壇：富貴黨白鴿黨行埋組「自民黨」?
話說自由黨（富貴黨）同民主黨（白鴿黨）早前首次破天荒聯手製作本港醫療政策建議書，繼上周兩黨議員打孖上去會見食物及衞生局局長高永文後，批發及零售界議員方剛尋日接受白鴿黨主席劉慧卿訪問時透露，富貴黨下星期會再夥拍白鴿黨約見醫管局主席梁智仁，討論公立醫院人手不足、資源分配不均等問題。咦！睇嚟愈行愈埋喎，係咪真係有機會合併做「自民黨」呀？
卿姐喺節目開始後幾分鐘就問方剛，有冇富貴黨支持者叫佢哋唔好同白鴿黨合作。方剛就好大方咁話，該黨唔少支持者都好贊成兩黨多啲合作溝通，又話建制派同泛民主派唔使吓吓企到咁硬，咁樣只會對市民帶來不利。
方剛又話兩黨上次見高永文時，對方都認同佢哋建議書內大部分建議，話當局已經積極處理緊，但有兩點就唔係咁容易做到，包括將有限度註冊醫生時限延長至三年，以及增加醫委會內非醫生委員嘅數目。高永文解釋咁係因為修改法例要經過較為複雜嘅程序，要慢慢研究點樣可以落實有關建議。
至於下星期點解要約見梁智仁，方剛就話想收集醫管局對佢哋份建議書嘅意見，又話醫管局內部有唔少問題，唔同醫院聯網又有山頭主義，希望對方可以對症下藥，盡快解決市民輪候時間過長嘅問題。嘩！呢次梁智仁肯定頭痕嘞！
再講合作有避忌
唔少建制派身處北京開兩會，方剛話稍後會向所有建制派議員分發建議書，睇吓佢哋對此有咩意見。卿姐都話已向泛民飯盒會提出同樣嘅嘢，但大家暫時未有時間傾。至於兩黨嚟緊仲有啲乜議題可以再合作，兩人就顯得有啲避忌，淨係話會一步一步嚟，唔肯再評論喺邊啲範疇仲有合作空間，莫非大家都覺得「自民黨」再合作落去遲早出事？
