貪湯風騷上京 兩會藏垢納污

前日之嘛，貪湯上立法會接受專責委員會最後一次「公審」，又被踢爆更多醜聞，包括收受○八年北京奧運及香港馬術賽事門票、喺廉署總部豪宴外國領事唱K劈酒等，當時貪湯臉如死灰，一律以「無記錄，唔記得，無印象」應付。有議員揶揄要撬開貪湯把口答問題，仲難過要撬開佢把口剝牙。

點不知一轉頭，貪湯已經一臉風騷，大搖大擺赴京出席全國兩會。唔怪得人哋話貪湯「茅台換政協」嘞，佢任內瘋狂送禮、頻繁「內交」，編織人際關係網，撈到個全國政協嘅頭銜，依家又以待罪之身享受「政協待遇」，簡直唔知醜字點寫。

最諷刺嘅係，貪湯今次除咗以全國政協身份參與兩會，仲有一頂中國人民大學法學博士嘅頭銜添。顧名思義，法學博士應該深諳法治精神，奉公守法，偏偏呢條友不廉不潔，大貪特貪。你話嘞，貪湯咁嘅人有乜資格做法學博士吖？做茅台博士、牛雜博士、魚蛋博士就差唔多！

係人都知，今屆兩會最大焦點正正係反腐，貪腐醜聞纏身兼被廉署調查嘅貪湯，居然仲大模廝樣出席兩會，搞到兩會好似貪官大會，你話兩會唔係藏垢納污都唔得喇，叮！

其實，貪湯何止茅台換政協吖，佢個所謂法學博士學位，一樣有靠關係撈番嚟之嫌。呢嗱，佢做廉政專員嗰陣，自把自為，以年薪百萬港元聘請內地學者擔任乜鬼廉政研究中心顧問喎。據講呢位學者正正係由貪湯博士學位指導老師推薦嘅，如果話當中冇私相授受，投桃報李，講都冇人信喇。

話時話，廉政公署刑事調查貪湯已經接近一年，查佢個前頂頭上司「貪曾」更加接近兩年，查來查去都係得個吉，一早有人懷疑佢哋背景不簡單。最近內地打大老虎，踢爆唔少貪官幕後都有「保護傘」，貪湯任內咁熱衷同內地官員打交道，如今又以待罪之身上京，唔通佢哋嘅「保護傘」就喺朝廷之中？

國家領導人講得好聽，唔反貪防腐就會亡黨亡國，其實香港都係一樣，唔反貪防腐就會亡港！問題係港府喺呢度反腐，國家卻喺嗰度護貪，香港遲早無官不貪，一國一制嘅咋，叮！