城中鏡：爭送愛侶上京 機場情意綿綿
全國人大政協兩會即將舉行，港區全國人大同政協尋日紛紛出發上京。記者咁啱經過機場貴賓室時，就見到身兼八和主席嘅政協「汪阿姐」汪明荃有老公羅家英嚟送機，阿姐披住紅色頸巾，拎住紅色手袋，連兩個帶上京嘅行李篋都係紅卜卜。只見早前啱啱完成腫瘤療程嘅家英哥坐喺車上，依依不捨同阿姐講拜拜，兩人都戴住黑超，甜到不得了。
羅家英嚟送汪明荃（右）機，兩人仲戴住情侶黑超添。
方黃吉雯搭飛機都着得好靚。
梁美芬（右）送王貴國機，依依不捨。
梁美芬依依不捨
立法會議員梁美芬就送身兼全國政協嘅老公王貴國入機場貴賓室，後來梁美芬離開，王貴國一直目送，直至離開佢嘅視線範圍至掉頭去辦理登機手續，佢哋結婚多年兩個仔都好大，感情一樣咁好，真係羨煞旁人。舊年都有老公黃定光嚟送機嘅全國政協林淑儀，今年就要孤零零咁黐實好姊妹全國政協陳婉嫻搭車去機場，唔知黃定光有乜事忙得咁緊要唔現身呢？而嫻姐早前感冒啱啱好番，所以戴住條大頸巾。
北京又凍、又乾燥，又有霧霾，身兼創興銀行副主席嘅全國政協委員梁高美懿都係一個人現身，佢話除帶咗潤手霜同護膚品之餘，仲帶埋川貝同羅漢果，用嚟沖水飲潤吓喉咁話。而全國政協委員盧文端就攞住個裝住漢堡包嘅紙袋行入貴賓室，佢話因為未食早餐喎。全國政協方黃吉雯着住長靴，手攞住件顏色斑斕嘅大褸上機，搭飛機都扮到咁靚，真係好積極嘅生活態度囉。
